Kappingarnevndin hjá FSF hevur avgjørt, at í 2026 verður U17 kappingin við dreingjum broytt til U18, og fer í ár at fevna um árgangirnar 2008, 2009 og 2010,

– Fyrst og fremst er hetta eftir ynski frá feløgunum, samstundis sum vit vænta og vóna, at fleiri av dreingjunum, ið annars høvdu hildið uppat við fótbóltinum aftaná U17, nú halda fram í øllum føri eitt ár afturat.

– Tað vísir seg nevniliga, at fráfallið er stórt aftaná U17, og tí gongdini ynskja vit at venda. Vónandi fær hetta eisini fleiri feløg at taka lut í U18 dreingjum, í mun til undanfarin ár í U17.

Soleiðis sigur tekniski stjórin í Fótbóltssambandi Føroya, Jonas Nielsen, í sambandi við at kappingarnevndin hjá FSF hevur tikið avgerð um, at í 2026 verður U17 aldursbólkurin hjá dreingjum víðkaður við einum árgangi, og verður í ár skipað sum U18.

Tað merkir heilt ítøkiliga, at U18 deildin hjá dreingjum í 2026 fer at fevna um tríggjar árgangir – 2008, 2009 og 2010. Hendan broyting er fyribils galdandi fyri kappingarárið 2026, og verður endurskoðað í sambandi við kappingargrundarlagið fyri ung.