– Mítt boð er, at løgtingsval verður um einar tveir mánaðir, kanska longu í mars.
Tað sigur Bárður á Steig Nielsen, formaður Sambandsfloksins.
Tað er í hvussu so er greitt, at løgtingsval skal vera í ár - og í seinasta lagi skal tað vera fyrst í desembur.
Men tað er slíkt órógv í samgonguni, at tað eru bara tey fægstu sum vænta, at samgongan fer at halda so leingi.
Hjá nógvum hevur spurningurin verið um løgtingsvalið verður fyri summarferiuna, ella beint eftir summarferiuna.
Men Bárður á Steig Nielsen sigur, at beint nú er hansara besta boð, at tað verður nú í vár, kanska longu í mars.
– Samstarvið í samgonguni er vánaligt, og harafturat liggja nøkur stórmál í Løgtinginum, sum samgongan skal taka støðu til, sigur Bárður á Steig Nielsen.
Her hugsar hann serliga um málið um at hækka pensjónsaldurin og málið um at projektera Suðuroyartunnilin og at bjóða arbeiðið út fyri at vita hvat hann kostar.
– Eg vænti at tey bæði málini fara at gera av við samgonguna, sigur Bárður á Steig Nielsen.
Hann sigur, at hesi bæði málini eru tengd sama.
– Tað lysti meg at síggja, at samgongan, kanska serliga Javnaðarflokkurin, fer at hækka pensjónsaldurin nú, nakrar fáar mánaðir fyri val, sigur formaðurin í Sambandsflokkinum.
– Og fellur málið um pensjónsaldurin, verður málið um Suðuroyartunnilin heldur ikki samtykt, leggur hann afturat.
– Tað slepst ikki undan, at politikarar í samgonguni fara at missa andlit í hesum málum, heldur formaðurin í Sambandsflokkinum.
Ein annar stórur spurningur, sum eisini máar støðið undan samgonguni, er málið um at stytta arbeiðsvikina.
Tað var eitt tað allarfremsta vallyftið, serliga hjá Javnaðarflokkinum.
Tað stendur eisini í samgonguskjalinum, at tað skal gerast, og at tað skal gerast við lóg. Men nú hevur løgmaður ásanna, at tað kortini ikki er undirtøka í samgonguni fyri at stytta arbeiðsvikuna við lóg.
Hinvegin hevur Ingilín Didriksen Strøm, tingkvinna fyri Javnaðarflokkin sett upp á, at tað lyftið SKAL haldast og at tað er avtalubrot í samgonguni at sleppa tí málinum.
Sostatt er eisini trýst á samgonguni í hesum máli og tað bøtir heldur ikki um samstarvið, sum frammanundan er skirvisligt, heldur Bárður á Steig Nielsen.
