Á Toftum hevur ljóðað, at Atli Fríði Johansen verður nýtt sambandsvalevni í Nes kommunu, og nú løgtingsvalið er útskrivað váttar Atli F. Johansen, at hann verður valevni hjá Sambandsflokkunum:
-Jú, tað er rætt, at tað er heitt á meg um at stilla upp, og at eg havi játtað, sigur Atli F. Johansen, tá ið Dimmalætting spyr hann um hetta.
Atli F. Johansen er 48 ára gamal. Á kommunuvalinum í 2024 fekk hann 89 atkvøður og var næstvaldur í býráðið, og síðani varð hann valdur at vera næstformaður í Nes kommunu.
Atli er ættaður av Glyvrum, er giftur á Toftum, býr á Nesi og hevur ættarbond í Lamba. Hann er skúlastjóri í Eysturkommunu, hann er deknur í Fríðrikskirkjuni, hevur sína gongd í missiónshúsinum á Toftum, og so syngur hann í kórinum í Glyvra kirkju.
Jaspur Langgaard, sum býr í Nes kommunu, hevur tvey tey seinastu valskeiðini verið í tinginum. Hann hevur boðað frá, at hann ikki stillar uppaftur.
Tað ber til at lesa meiri í Dimmalætting, sum er til keyps bæði á netinum og í sølubúðunum.
