Løgreglan sigur, at higartil á páskum hevur tað verið avbera friðrligt.

Í nátt læt ikki í telefonini hjá løgregluni, so tá var einki at gera.

Men dagin í gjár brúktu tey til at gera ferðslukanningar ymsastaðni.

Í Klaksvík hevur býráðið gjørt eina roynd at skipa ferðsluna rundan um skúla, betur og í tí sambandi eru nakrir vegir gjørdir einsrættaðir.

Ein av hesum vegstrekkjunum er Kráargøta, men tað hava ikki allir bilførarar funnið út av.

Og í gjár vorðu tríggir bilførarar tiknir fyri at koyra øvugtan veg av tí, sum loyvt er á Kráargøtu, og tað kostar teimum eina bót upp á 1.500 krónur, umframt eitt klipp í koyrikortið.

Í Søldafjørði gjørdu tey ferðmátingar og har varð ein tikin fyri at koyra 71 kilometrar um tíman har tað annars er loyvt at koyra 50.

Tað fær hann bót fyri, men tað er eisini akkurát nokk til at hann eisini bjargaði sær eitt klipp í koyrikortið.

Tá ið løgreglan er á Glyvursvegi á Argjum og ger ferðmátingar, er tað aldrin til fánýtis, og tað var tað heldur ikki í gjár. Har varð ein bilførari tikin fyri at koyra 74 kilometrar um tíman, og tað kostar honum bót og eitt klipp í koyrikortið, tí har er bara loyvt at koyra 50.