Tað var greitt undan lutakastinum, at Trier í Týsklandi fór at verða heimstaðurin hjá føroyska kvinnulandsliðnum til innleiðandi bólkaspælið í HM-endaspælinum í november/desember. Vertirnir høvdu ynskt at staðseta Føroyar í bólk D, hetta við fjepparum og atgongumerkjasølu fyri eyga. Við lutakastinum í S´Hertogenbosch í dag, gjørdist greitt, at mótstøðuliðini verða Montenegro, Spania og Paraguei.
Innleiðandi dystirnir hjá Føroyum liggja soleiðis:
Mikudagin 26. november: Montenegro – Føroyar
Fríggjadagin 28. november: Spania – Føroyar
Sunnudagin 30. november: Føroyar – Paraguei
Dystirnir verða leiktir í Trier Arena, sum tekur uml 5.400 áskoðarar. Kunning um atgongumerkjasølu kemur seinni.
Talan er um spennandi lutakast fyri Føroyar. Til seinasta EM, í 2024, gjørdist Montenegro nummar 8, Spania nr. 13. Føroyar gjørdust nummar 17.
Til seinasta HM, sum var í 2023, gjørdist Montenegro nr. 7, Spania nr. 13. og Paraguei nr. 29. Føroyar vunnu seg ikki til endaspælið.
Um Føroyar gerðast millum trý tey bestu liðini í bólkinum, skulu Føroyar víðari til Dortmund til millumumfarið. Liðið, sum verður nummar fýra í bólkinum, skal spæla Presidents Cup í S´Hertogenbosch.
