Navnið kundi ikki verið betur valt. 

Tað halda fleiri býráðslimir í Havn, nú tað er greitt, at nýggi ringvegurin oman fyri Havnina, sum er gjørdur í sambandi við Eysturoyartunnilin, skal eita Havnarvegur.

Vegurin verður ein nýggjur høvuðsvegur oman fyri Havnina og nakað síðani varð Gøtunavnanevndin biðin um at koma við einum uppskoti um, hvussu vegurin skuldi eita.

Meirilutin í nevndini Marjun Arge Simonsen, Ronnie Thomassen og Annfinnur Hjelm, mælti til, at innkomuvegurin, sum hann verður kallaður á mannamunni, fær navnið Ytri Ringvegur.

Men minnilutiin í nevndini, Jógvan Arge og Marius Rein, halda, at hann skal fáa navnið Havnarvegur.

Og býráðslimir halda, at her hevur minnilutin ordiliga rakt plett - og hóast hetta bara er eitt veganavn. hevur tað kanska størri týdning fyri býráðslimir, enn ein kanska skuldi trúð

Tróndur Sigurðsson, býráðslimur fyri Kommunulistan, sigur, at hann bleiv kensluborin tá ið hann sá uppskotið hjá minnilutanum.

– Eg fari aldrin at atkvøða ímóti einum slíkum navni, segði hann.

Partamaður hansara á Kommunulistanum, Kári Johansen, segði, at hann fór upp at ristast tá ið hann hoyrdi navnið.

– Hjartað fór ordiliga upp á kók, legði hann afturat - og hann undraðist á, at eingin annar hevur funnið upp á hetta fyrr.

Allir hinir býráðslimirnir eru samdir, tí tað varð einmælt samtykt, at hann skuldi eita Havnarvegur.

Annfinn Brekkstein heldur, at sjálvandi skal vegurin eita so, tí tað hevur týdning fyri Havnina, at vit fáa ein Havnarveg. Og havnarhjartað hjá Guttormi í Skála fór ordiliga at banka, tá ið hann hoyrdi navnið.

Og Høgni Vilhelmsen, býráðslimur fyri Fólkaflokkin, mundi dottið uppeftir, tá ið hann sá navnið, tí hann heldur, at tað er sjálvsagt fyri handan vegin.

Úrslitið varð eisini, at navnið varð einmælt samtykt í býráðnum.