Mark Carney, nýggi leiðarin í Liberala Flokkinum í Kanada, er tikin í eið sum 24. forsætisráðharri í landinum. Hetta skrivar kanadiski almenni miðilin CBC.

Nú er nýggja stjórn hansara um at verða tikin í eið.

Stjórnin verður nevnd "ein slankari og meira miðvís stjórn" enn tann hjá fráfarandi forsætisráðharranum Justin Trudeau, skrivar CBC.

Eftir eitt langt tíðarskeið við innanhýsis ófriði í Liberala Flokkinum boðaði Trudeau frá, at hann fór at leggja frá sær bæði sum floksformaður og forsætisráðharri, tá flokkurin hevði valt eftirmann hansara.