Hetta er eitt bakkast fyri ferðavinnuna - serliga fyri ferðavinnuna úti um landið.
Tað sigur Henny á Líknargøtu, forkvinna í Ferðavinnufelagnum, nú Strandferðslan hevur broytt prísirnar á ferðaseðlum.
Serliga loypur tað í eyguni, at ferðaseðlaprísirnir fyri útlendsk ferðafólk hækkar heili 75 prosent.
Og tað kemur í gildi um longu eina viku.
Les meiri um tað her: https://dimma.fo/grein/nu-verdur-dyrariu-hja-teimum-flestu-at-ferdast-vid-strandferdsluni
Sum vit eisini skrivaðu í áðni, helt Oda Wilhelmsdóttir Andreasen, ferðasmiðjur í Mykinesi, at hetta er so langt úti, at tað er ikki orð fyri tí.
Les meiri um tað her: https://dimma.fo/grein/hetta-er-so-langt-uti-av-strandferdsluni-at-tad-er-ikki-ord-fyri-ti
Henny á Líknargøtu heldur, at tað er ikki so undarligt, at prísirnir hækka - men mátin tað verður gjørt upp á, er eitt stórt bakkast fyri ferðavinnuna.
– Prísirnir eru ikki hækkaðir í fleiri ár, so tað er ikki so undarligt at teir verða hækkaðir, sigur hon.
Men tann stóri trupulleikin er, at príshækkingarnar verða settar í verk við so stuttum skotbrái.
Vit hava longu selt eini 80 prosent av summarinum, tað eru fólk, sum hava bílagt ferðir og lagt alt til rættis. Og ferðasmiðir hava gjørt pakkaferðir við teimum prísum sum vóru.
Tann stóri trupulleikin er, at ferðavinnan ikki fær longri skotbrá at laga seg til nýggju prísirnar, sigur Henny á Líknargøtu.
Sjálv arbeiðir hon á Smyril Line og hon sigur, at har verða prísirnir ásettir minst eitt ár frammanundan, tí tað eru so nógv lið í ferðavinnuni, sum skulu laga seg til nýggju ferðaseðlaprísirnir.
Tað er púra vanligt í ferðavinnuni, at prísbroytingar verða settar í verk við minst eitt árs freist, sigur Henny á Líknargøtu.
Hevði Strandferðslan, ella politiska skipanin, gjørt tað sama, hevði tað verið til gagns fyri okkum øll, sigur hon.
Forkvinnan í Ferðavinnufelagnum sigur, at hetta fer serliga at raka tær eldsálir, sum stríðast fyri at menna ferðavinnuna kring landið.
– Nú verða tey brádliga rakt av eini príshækking upp á heili 75 prosent, sum er púra óneyðug, tí hon átti at komið langt áðrenn - ella skuldi hon ikki komið í gildi fyrr enn næsta summar, sigur hon.
