Í fjør gav fólkarokkbólkurin Hamradun út sína triðju heildarútgávu, Nætur níggju. Talan var um triðju heildarútgávuna hjá bólkinum. Tær báðar fyrru komu út í ávikavist 2015 og 2019.
Bólkurin hevði fleiri stórar konsertir, m.a. útgávukonsertir fyri fullum sali í Norðurlandahúsinum, og spældi eisini onkrar konsertir uttanlanda.
Góða gongdin hjá bólkinum heldur fram í ár, tí nýggjársaftan varð kunngjørt, at Hamradun skal framføra á týska fólkarokk- og metalfestivalinum Hörnerfest, sum verður hildin í Brande-Hörnerkirchen, sum liggur beint uttanfyri Hamburg.
Skráin er blandað við bólkum úr nógvum ymsum londum, og høvuðsnavnið í ár er finski fólkametalbólkurin Korpiklaani.
Pól Arni Holm, oddamaður í Hamradun, greiðir frá, at bólkurin hevur ein týskan bókara, sum hjálpir teimum við at fáa pláss á ymsum festivalum og spælistøðum runt í Evropa.
- Hetta kemur væl við hjá okkum. Vit fáa møguleika fyri at røkka einari enn breiðari áskoðarafjøld, og so er tað bara altíð fantastiskt at sleppa at framføra live, sigur Pól Arni Holm við Dimmalætting.
Plakatin fyri 2025 útgávuna av Hörnerfest festivalinum
