Tað er sensatión yvir sensatiónir. Í kvøld hevur føroyska U-21 landsliðið í hondbólti vunnið ímóti Fraklandi í miðumfarinum í HM kappingini, sum er í Póllandi.

Úrslitið var 28-27 til Føroyar, eftir at Frakland í steðginum var frammanfyri 17-16.

Sigurin ber við sær, at Føroyar hava tryggjað sær pláss í HM fjórðingsfinaluni, og at Føroyar og Danmark, sum fyrr í dag vann ímóti Rumenia, í morgin fara at spæla um fyrsta plássið í bólkinum. Tann dysturin verður klokkan 15.15. Uttan mun til hvussu úrslitið verður í morgin, so er tað ein veruleiki, at Føroyar í U-21 hondbólti fyri menn eru millum átta tey bestu í heiminum.

At Føroyar vinna ímóti Fraklandi eigur so at siga ikki at koma fyri. Men í kvøld vístu U-21 menninir, at fyri teir er einki óført, og síðstu løtuna stongdi málverjin málið aftanfyri verjuna, sum av álvara var sum bergið.

Frakland var frammanfyri trimum málum, tá ellivu minuttir vóru eftir.

Sìðani skoraðu fraklendingar bara tvey mál.

Føroyskur toppskjútti var Óli Mittún, sum skoraði níggju mál. Fýra av teimum vóru við brotskøstum, sum Óli var ósvikaliga tryggur í, tá ið hann avgreiddi tey.

Eftir dystin var Óli Mittún kosin at vera besti spælari í kvøld.

Hinir málskjúttarnir vóru Ísak Vedelsbøl 4, Niklas Gaard 4, Rókur Ziskason 3, Høgni Heinason 3,
Trúgvi Hávardsson 1, Høgni Højsted 1, Tóki Friðriksson 1, Búi Poulsen 1 og Sofus í Selvindi Nattestad 1 mál.

5 min: 4-2
10 min: 5-7
15 min: 8-11
20 min: 11-12
25 min: 14-13
30 min: 16-17
35 min: 16-20
40 min: 19-21
45 min: 21-24
50 min: 24-26
55 min: 26-26
60 min: 28-27