Tað er ein vanlig sjón, at Norrøna stevnir inn á Seyðisfjørð í Íslandi tíðliga hósmorgun. Men tá ið Norrøna kom á Seyðisfjørð í morgun, vóru tað kortini nógv, sum gníggjaðu sær um eyguni.

Tað lá nevniliga ein stórur hvalur tvørtur um bunustevni á Norrønu, skrivar Ausurfrett í dag.

Tey siga frá havnafútanum, at hann varnaðist, at okkurt var galið, tí Norrøna larmaði meiri enn vanligt, tá ið hon kom inn í Havnina og tá sá hann hvalin liggja tvørtur um stevnið.

Umborð á Norrønu vistu tey ikki av nøkrum. Austurfrett sigur kortini frá skiparanum, at um sjey tíðina í morgun varnaðust tey, at tey høvdu siglt á okkurt í sjónum, men tey vistu ikki, hvat tað var, og tað førdi ikki til nakrar seinkingar.

Men hetta er kortini ikki nakað, tey hava verið úti fyri áður.

Talan var um ein stóran hval, sum vigaði fleiri tons, so tað var eitt baks at fáa hann av aftur, og teir fyrstu stropparnir slitnaðu eisini.

Stór mannfjøld var á keiini og hugdu at tá ið hvalurin varð hivaður av stevnunum og bundin fram við bryggjuni, sigur Austurfrett. Nú skal greiða so fáast á, hvat skal gerast við hann.

Mett verður, at helst var hvalurin deyður, ella hálvdeyður, tá ið Norrøna rendi á hann, annars hevði hann uttan iva svomið undan.

Upprunaliga søgdu íslendingar, at talan var um ein stóran grindahval, men nú verður sagt, at talan er um eina kúlubøku.