Jóansøka er á Tvøroyri hetta vikuskiftið og eyðvitað er tað nógv fólk, sum leitar sær suður. Men í gjárkvøldið var Smyril so fullur, at pláss var ikki fyri nógvum av farminum, sum annars skuldi við.

Tessvegna stóð nógv eftir, men í hesum føri ar tað kanska serliga óheppið, at tað, sum stóð eftir, er nógv av jóansøkumatinum, sum skuldi í handlarnar upp undir jóansøkuna.

Handlarnir av lýst við nógvum jóansøkutilboðum, men nógv fólk, sum hava verið í handlunum, eru farin avstað aftur sum av tórvheiðum, tí maturin stóð eftir í Havn.

Dánjal Samuelsen, samferðsluleiðari á Strandferðsluni, sigur, at hann fekk boðini í gjárkvøldið.

Tí varð gjørt av at taka Teistan úr nólsoyarsiglingini so at hann kundi fara ein eykatúr til Suðuroyar í morgum, fullur av jóansøkumati.

Hann sigur, at talan er um rættiliga nógva vøru, tí talan er um tvey stór sleip, bæði frystivøra og kølivøra.

Teistin verður á Krambatanga onkuntíð ímillum klokkan 12.30 og 13 í dag.

Samferðsluleiðarin sigur, at ætlanin er so at taka farm norður aftur við, so at hann ikki skal sigla tómur.

Ístaðin fyri Teistan, hevur Ternan loyst í Klaksvík, har hon hevur ligið, og hon fer nú at røkja nólsoyarsiglingina.