Løgreglan hevur havt úr at gera seinasta døgnið. Telefonin hevur ringt allan gjáradagin og alla náttina, líka til kl. 09.00 í morgun. Telefonnetið var til tíðir órógvað av hesum.

-Eg havi ikki tal uppá hvussu nógvar uppringingar vit hava havt, men í gjár snúðu uml. 70% av teimum snúðu seg um parkering. Bilar vóru parkeraðir inni í túninum hjá fólki, tvørturum innkoyringar, ella hvar sum helst har var bara eitt ledigt plass.

-Tað var at samanlíkna við hvussu skógvar liggja í gongini til ein barnaføðingardag. So lítið skil var á, at um eldur hevði komið í, ella onkur mátti heintast av sjúkrabili, so hevði ikki borið til hjá hvørki sjúkra- ella brandbili at komið fram, segði vakthavandi.

Eisini vóru heilt ógiliga nógv fólk í býnum alla nátt, og nógv vóru rættuliga rúsaði.

Nógv fólk vóru borin og koyrd til hús, nógvar ósemjur loystar og eisini vóru fólk reist uppaftur á beinini har tey lógu, men tað er einki mál gjørt burturúr.

Tvey minni harðskapsmál eru tó, har tað enn ikki er avgjørt um tey enda við bót, ella skuldseting.

Nógvir sjúkrabilar eru sendir avstað í nátt eisini, men vaktleiðarin staðfestur, at samarittarnir gera eitt ómetaliga gott arbeiði við at hjálpa folki sum hava tørv á tí.