Fíggjarmálaráðið góðtekur ikki dómin, sum Føroya rættur fríggjadagin segði í sambandi við kommunuvalið í Runavíkar kommunu. Føroya rættur avgjørdi fríggjadagin, at tað ikki verður umval í Runavíkar kommunu í morgin soleiðis, sum løgmálaráðið segði, at tað skuldi vera.

Føroya rættur avgjørdi fríggjadagin, at spurningurin um umval verður útsettur, inntil málið um valsvik er avgjørt í rættinum. Tað málið verður viðgjørt í rættinum síðst í februar.

Dagur og vika visti í kvøld at siga, at fíggjarmálaráðið hevur kært dómin, sum Føroya rættur segði fríggjadagin.

-Løgreglan, ákæruvaldið og Løgmálaráðið hava mett, at tað eru sannlíkindi valsviki í Oyndarfirði, og tað halda vit ikki, at vit kunnu síggja burtur frá. Tí halda vit, at tað er rætt, at landsrætturin tekur støðu til valið, segði Ruth Vang landsstýriskvinna í fíggjarmálum í Degi og viku í kvøld.

Eftir at landsstýrið var umskipað og løgmálaráðið avtikið, er tað fíggjarmálaráðið, sum hevur kommunumál og harvið kommunumál um hendi.

- At málið um valsvik hevur við sær steðgandi virknað, ber eftir øllum at døma við sær, at tað málið fer at koyra alt valskeiðið, og tað er burturvið í sambandi við møguliga umvalið, tá tað mesta av valskeiðinum verður av. Tí halda vit, at hetta málið kann ikki bíða, segði Ruth Vang, landsstýriskvinna í fíggjarmálum, við Dag og viku í kvøld.

Enn er tað ikki greitt, nær Eystari landsrættur fer at viðgera kæruna.