Djóni Nolsøe Joensen, landsstýrismaður í barna- og útbúgvingarmálum, hevur undirskrivað samstarvsavtalu við landsfelagið fyri føroyskan dans, Sláið Ring, um fíggjarligan stuðul til árliga kvæðastevnu fyri næmingar í fólkaskúlanum.

Tað var Gunnar Restorff, formaður, sum skrivaði undir vegna Sláið Ring. Stuðul hevur verið veittur til kvæðastevnur fólkaskúlans í nøkur ár, men tørvur hevur verið á tryggari karmum fyri hetta virksemi, sum arbeitt hevur verið við í eina tíð.

Tað er eitt megnar arbeiði dansifeløgini gera við at varðveita og styrkja føroyska dansin. Kvæðastevnan kann vónandi geva næmingunum góðar kvæðaupplivingar, ið kunnu kveikja hugin hjá teimum at dansa føroyskan dans. Kvæðastevnan stuðlar eisini undir kvæðaundirvísingina í miðdeild fólkaskúlans.