Týskvøldið 18. november bórust syrgiligu boðini, um at Benjamin Gunnarstein andaðist, bert 33 ára gamal.
Benjamin var við síni drívmegi eitt so sera gott og positivt menniskja. Hann var fullur av orku og altíð klárur at hjálpa.
Hann gjørdi - við føroyskari mammu og donskum pápa - bæði londini til sín heimavøll, bæði sum menniskja og sum badmintonspælari. Hjá okkum, sum fáast við badminton í Føroyum, var Benjamin ein gáva til badmintonumhvørvið.
Benjamin flutti til Føroyar kappingarárið 2014/15, har hann var venjari hjá Havnar Badmintonfelag. Sum venjari var hann framúr. Benjamin dugdi væl at lurta og tosa við allar spælarar, og lærdu tey nógv frá honum. Benjamin var eisini venjari til bæði badmintonlegur og -skúlar, har leikarar úr øllum Føroyum luttóku.
Vit minnast øll serligu orkuna, sum var í høllini, tá Benjamin var venjari. Hann hevur havt sera nógv at týða fyri føroyskt badminton og fyri okkara leikarar. Við sínum blíða lyndi og positiva sinni hevur hann lært fleiri av okkara nú vaksnu leikarum nógv, og hevur hann eisini sett sítt merki á okkum, sum standa uttanfyri banan.
Sum leikari luttók Benjamin fleiri ferðir í føroysku kappingini um føroyameistaraheitini, har hann fleiri ferðir vann heiðursmerki í bæði einmans-, tvímans- og blandaðum tvímansleiki. Benjamin gjørdi stóran mun fyri okkara føroysku spælarar, har tey mangan sóu fram til dystin móti honum. Fyri ungu spælararnar var Benjamin ein stjørna, og heppaðu tey á hann til dystirnar um føroyameistaraheitið.
Benjamin var eisini leikari á føroyska badmintonlandsliðnum, har hann hevur spælt mangan góðan dystin fyri Føroyar. Hann hevur m.a luttikið í EM og á oyggjaleikunum á Jersey 2015. Tað hevði stóran týdning fyri Benjamin at umboða Føroyar á oyggjaleikum, og vann hann eisini heiðurmerki heim við til Føroyar.
Benjamin gjørdist sjúkur í 2022. Men hóast sjúkur, kom hann í 2023 heim til Føroya at luttaka í FM kappingini og at hjálpa okkum við Badmintonskúlanum. Sum altíð gav Benjamin alt, og aftur hesaferð var hann partur av spennandi kapping og góðum læruumhvørvi.
Vit í Havnar Badmintonfelag og Badmintonsambandi Føroya eru sera takksom fyri, at Benjamin hevur verið partur av føroyskum badminton, og fyri alt, sum hann hevur givið okkum. Vit fara altíð at minnast Benjamin sum tað evnaríka og góða menniskja, hann var.
Okkara tankar fara til tykkum, sum eftir sita, og senda vit tykkum okkara djúpastu samkenslu.
Hvíl í friði, góði Benjamin
Havnar Badmintonfelag og Badmintonsamband Føroya
