Hetta vikuskiftið fer næstbesta fótbóltsdeildin í Danmark í vetrarfrí.

Síðsti dystur hjá Hillerød IF undan vetrarsteðginum var fríggjakvøldið á útivølli ímóti Lyngby, sum hevur Dan Brimsvík á beinkinum.

Millum teir fyrstu ellivu hjá Hillerød IF vóru Poul Kallsberg og Adrian Justinussen, sum fyri síðstu ferð í hesum umfarinum umboðaði Hillerød IF, har hann nógvu tær seinastu ferðirnar hevur verið fremsti maður.

Hillerød IF vann 1-0, og nú Adrian fer úr felagnum, er Hillerød topplið saman við Lyngby. Bæði liðini hava 32 stig fyri 18 dystir.

Adrian fer nú at spæla við AC Horsens, sum í dag á heimavølli var partur av málleysum javnleiki ímóti gamla stórfelagnum AaB. Horsens er á triðja plássi við 29 stigum, sum Hvidovre IF og Esbjerg fB eisini hava.

Nú kappingin fór í vetrarfrí, valdu teir í Hillerød IF besta spælaran í fyrstu 18 umførunum, og tað var Adrian Justinussen, sum er einsamallur toppskjútti í deildini við 10 málum.

Næsti dystur hjá Adriani Justinussen verður fyrsta mars, tá ið AC Horsens fer at spæla á útivølli ímóti Esbjerg fB. Næsti dystur hjá Poul Kallsberg og Hillerød IF verður fyrsta mars á útivølli ímóti AaB.