HB fyrireikar seg nú til at fara norður til Gøtu. Síðsti landskappingardysturin í ár verður í Sarpugerði klokkan 14.30, og tá hevur HB møguleika at vinna silvurkrónurnar.
Tað er greitt, at André Olsen verður venjari í 2026. Stóri spurningurin er, hvussu liðið verður mannað næsta ár.
Umleið helmingurin av spælarunum, sum í ár hava verið við til at manna liðið, hava skrivað undir sáttmála. Millum teir, sum ikki hava skrivað undir sáttmála, eru toppskjúttin Emil G. Pedersen og liðformaðurin Viljormur Davidsen. Hesir báðir hava verið bestu HB spælararnir í ár.
Tað ljóðar, at Viljormur Davidsen næsta ár fer at spæla við barndómsfelagnum NSÍ, og tað ljóðar eisini, at 07 Vestur er áhugað í at fáa hann at spæla har vesturi.
-Eg havi fingið onkrar fyrispurningar, men enn er eingin avgerð tikin. Í næstu viku verður møguleiki at hugsa um hetta, sigur Viljormur Davidsen.
Fert tú at halda fram í HB?
-Nú verður sáttmálaskeiðið við HB liðugt, og so er møguleiki fyri nýggjum sáttmála. Um hann verður við HB ella okkurt annað felag, fáa vit at síggja. Í løtuni snýr tað seg um dystin ímóti Víkingi, sum er tann síðsti í hesum sáttmálaskeiðnum.
34 ára gamli Viljormur Davidsen hevur spælt við HB í trý ár. Hann hevur spælt 86 dystir í reyðu og svørtu troyggjuni, veit FaroeSoccer at siga.
