Útlendingar, sum koma til Føroya, skapa ikki bara inntøkur. Teir eru eisini ein útreiðsla fyri bæði landskassan og kommunurnar.

Tað staðfestir Eyðdis Hartmann Niclasen, tingkvinna fyri Sambandsflokkin.

Og nú vil hon hava Ruth Vang, landsstýriskvinnu í fíggjarmálum, at leggja tølini á borðið fyri, hvørjar útreiðslur í roynd og verið standast av at fáa útlendingar til Føroya.

 – Víst verður mangan á, hvønn týdning útlendsk arbeiðsmegi hevur fyri føroyska búskapin, men minni verður greitt frá um tær útreiðslur, sum fylgja við, sigur løgtingskvinnan.

– Vit vita, at drúgvar viðgerðartíðir hava víst, at Útlendingastovan hevur brúk fyri fleiri starvsfólkum og nýggjum KT-skipanum. Eisini hevur trupulleikin við uppihaldskortum longu kravt eyka arbeiðsorku og kostnað.

– Hetta merkir, at tað eru størri útreiðslur hjá almennu kassunum, sigur Eyðdis Hartmanna Niclasen.

– Harumframt hevur familjusamanføring við sær útreiðslur hjá bæði landi og kommunum í samband við integratión á dagstovnum, skúlum og hjá heilsuverkinum, sigur hon.

Harumframt eru útreiðslurnar á barnaverndarøkinum hækkaðar munandi frá 2023 til í fjør.

– Í Danmark vísa greiningar, at innflutt arbeiðsmegi gevur eitt positivt íkast, men familjusamanføringar, tíverri, draga niður, sigur tingkvinnan fyri Sambandsflokkin.

Tí heldur hon, at tað er týdningarmikið at fáa greiðu á, hvørjar útreiðslur Føroyar hava á hesum økinum, og um nøkur búskaparlig meting er gjørd, tá ið bæði inntøkur og útreiðslur verða tiknar við.