Í gjár gjørdi løgreglan ferðslukanningar á einum vegastrekki, har tey ikki eru so ofta. Tað var nevniliga á Velbastaðvegnum, at tey kannaðu ferðsluna fyrrapartin í gjár. Har er loyvi at koyra 60 og tá ið hámarksferðin er upp aftur meiri avmarkað enn tað vanliga, skal lítið til at fáa klipp í koyrikortið, ella at missa tað.

Tað merkir, at tann, sum koyrir 76 kilometrar um tíman, fær klipp í koyrikortið, og tann sum koyrir 81 kilometrar um tíman, missur tað treytað.

Og á Velbastaðvegnum vórðu tveir bilførarar tiknir fyri at koyra ov skjótt. Teir vórðu skrásettir at koyra beint undir 80, so teir fáa hvør sítt klipp í koyrikortið, umframt eina bót. Høvdu teir verðið skrásettir fyri at koyra 81, høvdu teir mist koyrikortið treytað.

Annars sigur løgreglan at tað var lítið av fólki í býnum í nátt. Løgreglan var úti um seg, og tey steðgaðu eisini fleiri bilum, men har var alt eftir forskriftunum.