Føroyska landsliðið riggar til at fara úr Georgia og aftur til Føroya. Eftir 1-0 tapið í Georgia hóskvøldið er fokus á HM undankappingardystinum ímóti Gibraltar, sum verður mánakvøldið ella 2. hvítusunnukvøld. Hetta verður sætti dysturin hjá Eyðuni Klakstein sum venjari, og hetta verður fyrsta ferðin, at Eyðun verður á heimavølli.

Meðan ferðin til Georgia var umvegis Istanbul í Turkalandi, so er heimferðin í leiguflogfari úr Georgia og beinleiðis til Keypmannahavnar og so fríggjadagin upp til Føroyar.

Einasta málið í Georgia skoraði heimaliðið eftir horna í 9. minutti. Heimaliðið var meiri á bóltinum, og heimaliðið hevði fleiri royndir ímóti málinum, men sum tíðin leið legði føroyska liðið nógv fyri í álopspartinum, og Daniel Johansen hevði góða roynd, og Páll A. Klettskarð hevði góðan møguleika at javna.

Millum teir fyrstu ellivu á føroyska liðnum vóru seks spælarar, sum síðstu tíðina ikki hava verið millum teir fyrstu ellivu. Tað ráddi um at telva soleiðis, at liðið av álvara verður trimmað undan stóru royndini á heimavølli mánakvøldið. Tí vera tað fleiri broytingar millum teir fyrstu ellivu, um tað verður sammett við liðið, sum byrjaði ímóti Georgia.

Í Georgia varð Hallur Hansson skiftur inn í 63. minutti. Hetta var 75. ferðin, at hann var á landsliðnum.

Eftir skaðasteðg vóru Jákup B. Andreasen og Patrik Johannesen aftur millum teir fyrstu ellivu. Felags fyri teir báðar var tað, at hetta var 25. ferðin, at teir vóru á landsliðnum.

Fróði Benjaminsen eigur framvegis landsliðsmetið. Hann spældi 95 landsdystir, og Jóan Símun Edmundsson hevur spælt 93 landsdystir. Viljormur Davidsen, sum var liðformaður í Georgia, er nummar trý í røðini við 87 landsdystum.

Óli Johannesen er á fjórða plássi við 83 landsdystum, og so eru tað Sølvi Vatnhamar (79), Hallur Hansson (75), Jákup Mikkelsen (73) og Gunnar Nielsen (70). Nú er Brandur H. Olsen á níggjunda plássi við 66 dystum. Hann er nú frammanfyri Jens Martin Knudsen og Gilla Rólantsson Sørensen (65).

Georgia – Føroyar 1-0 (1-0)

1-0: Luka Lochoshvili 9.

Dómarabólkur úr Belgia: Jasper Vergoote, Michele Seeldraeyers og Martijn Tiesters og Goga Kikacheishvili (4. dómari úr Georgia)

Føroyar: Bárður á Reynatrøð – Gullbrandur Øregaard, Gunnar Vatnhamar (Adrian Justinussen, 46.), Viljormur Davidsen – Jann J. Benjaminsen (Hallur Hansson, 63.), Noah Mnenéy (Brandur Hendriksson Olsen, 63.), Jákup B. Andreasen, Daniel Johansen – Hanus Sørensen, Patrik Johannesen (Petur Knudsen 63./Páll A. Klettskarð 71.), Poul Kallsberg (Árni Frederiksberg, 63.)

Á beinkinum uttan at verða skiftir inn: Mattias H. Lamhauge, Ari í Haraldstovu Petersen, Jóannes K. Danielsen, Andrias Edmundsson, Martin Agnarsson, Odmar Færø

Venjari: Eyðun Klakstein

kelda: FaroeSoccer