Dagurin í gjár verður ein dýr søga fyri ein bilførara í Klaksvík. Um døgurða tíð í gjár steðgaði løgreglan einum bili í Klaksvík og tá ið bilførarin varð kannaður, vísti tað seg, at hann var ávirkaður av rúsdrekka.

Blóðroynd varð tikin av honum og hann varð skuldsettur.

Men longu seinnapartin varð hann tikin eina ferð afturat. Tá ringdu fólk at boða frá einum ferðsluóhappi, har ein bilur hevði rent á ein parkeraðan bil - og tey sum ringdu, høvdu illgruna um, at bilførarin var ávirkaður av rúsdrekka.

Tá ið løgreglan kom á staðið, vísti tað seg, at talan var um sama bilførara, sum varð tikin á miðdegi.

Men hann hevði ikki lært nógv fyrru ferð hann varð tikin, tí seinnu ferð, hann varð tikin, var promillan enn hægri enn hon var fyrru ferð.

Løgreglan sigur, at nú verða bæði málini løgd saman, og so verður revsingin ásett.