Ein stór tokvanlukka hevur verið í Norðursælandi í morgun. Tvey tok rendu frontalt saman við Helsingevej í Hillerød.

Tað upplýsir Martin Schmidt, rakstrarleiðari hjá tilbúgvingartænastuni í Keypmannahavn.

- Stóra tilbúgvingartoymið var sett út, og í minsta lagi 60 hjálparfólk vóru til staðar við vanlukkuna, legði rakstrarleiðarin afturat.

Sjjey sjúkrabilar, tveir neyðhjálparbilar, triggjir sjúkraflutningsbilar og ein neyðhjálparleiðari vóru á staðnum, umframt ein tyrla frá herinum.

Løgreglan í Norðursælandi upplýsir nú í tíðindaskrivi, at tað eru 18 særd eftir vanlukkuna, harav fimm enn álvarsliga. 37 fólk vóru teimun báðum tokunum.

Trygdarleiðarin hjá Lokaltog, Claus René Pedersson, upplýsir fyri TV 2, at tveir av teimum særdu í tokvanlukkuni millum Hillerød og Kagerup í Norðursælandi eru starvsfólk.

- Báðir okkara tokførarar hava fingið skaða og eru fluttir á sjúkrahús, sigur hann.

Claus René Pedersson kann ikki siga nágreiniliga hvat er hent teimum báðum, men sigur, at teir báðir hava ymisk sløg av brotum, eisini álvarslig.

- Teir eru ikki deyðiliga særdir, tað hava vit onga fráboðan fingið um, upplýsir trygdarleiðarin.