Leygardagin, sjálvan flaggdagin, verður finaludagur í flogbólti. Tá hittast kvinnuliðini hjá Mjølnir í Klaksvík, og TB á Tvøroyri, í steypakappinhi í flogbólti.
Finalan verður í høllini við Tjarnir klokkan 14 leygardagin, men dyrnar verða lætnar upp klokkan 13 við ymsum undirhaldi, og øðrum.
Hetta er fyrstu ferð, at steypafinalurnar í flogbólti verða í høllini við Tjarnir.
Flogbóltssambandi sigur, at við sigri á Mjølni í steypafinaluni 2002 steðgaði TB sigursrøðini hjá klaksvíkingum, sum høvdu vunnið finaluna undanfarnu tvey árini.
Hetta gjørdist byrjanin til glæsiligasta tíðarskeiðið hjá TB, sum vann fýra av fimm steypafinalum frá 2002-2006 umframt føroyameistarheitið í 2002.
Síðani hevur verið longri ímillum tey heilt góðu úrslitini hjá TB - eitt føroyameistaraheiti í 2015 og eina steypakapping vann felagið í 2017, men síðani hevur TB ikki verið í nakrari finalu; hvørki FM- ella steypafinalu, sigur flogbóltssambandið.
Men nú er TB loksins aftur í eini finalu, og aftur hesa ferð er tað Mjølnir, sum stendur hinumegin netið - júst sum í 2002.
Og aftur hesa ferð er tað Mjølnir, sum er verandi steypavinnari, men spurningurin er um TB klárar at taka steypið frá teimum.
Flogbóltssambandi sigur, at sum tað hevði gingið hjá TB í landskappingini, varð ikki mett, at tær skuldu røkka heilt í ffinaluna.
Men tá ið TB fyrst vann 3-0 á KÍF, og síðani 3-0 á SÍ, sum júst hevði vunnið føroyameistaraheitið, vóru tær brádliga favorittur at vinna á Fleyr í hálvfinaluni síðsta leygardag. Og hóast fimm sett skuldu til, stóð TB royndina og spældi seg í sína fyrstu finalu í níggju ár.
Men mótstøðan hjá TB verður tó munandi harðari í finaluni leygardagin, har Mjølnir má metast at vera tað sterkara liðið. Her verður serliga hugsað um, at Mjølnir vann allar landskappingardystirnar ímóti TB 3-0.
– Gaman í hevur TB tikið seg munandi fram, síðani ukrainska, Yevheniia Prykhodko, og kolumbiska ,Karol Hernandez, komu á liðið eftir ársskiftið, sigur Flogbóltssambandið.
Men so seint sum 7. mars vann Mjølnir landskappingardystin móti TB 3-0 við teimum báðum á liðnum, tó at annað sett endaði 30-28.
Haraftrat tapti Mjølnir bara tveir dystir í landskappingini - tann allar fyrsta dystin, sum var ímóti Fleyr og tann allar síðsta, sum var ímóti SÍ.
– At so Mjølnir haraftrat tapti báðar FM-finalurnar fyri SÍ, var ein strika í rokningini, men í Klaksvík hildu tey, at Mjølnir átti meira í sær, enn víst var í FM-finalunum.
– Tað fær Mølnir høvi at vísa leygardagin, sigu Flogbóltssambandið.
