Ongi úrslit

Royndu at finna umvegir, so Sólvit kundi verða verandi í Framsókn

Í samband við avgerðina hjá Framsókn at binda síni valevni til at taka undir við fríari fosturtøku, royndi leiðslan í flokkinum at finna tekniskar snildir, so fyrrverandi tingbólkaformaðurin, Sólvit E. Nolsø, kundi halda fram í flokkinum.

Ragnar Sjurðarson
11. august kl. 18:54

Byrjanin til brotið hjá Sólvit E. Nolsø við Framsókn og við politikk kom alment til sjóndar, tá hann saman við Honnu Jensen var við til at fella uppskotið um fría fosturtøku í vár í fjør. Fleiri fólk í baklandinum vóru í øðini, og sjálvur stovnarin av flokkinum, Poul Michelsen, segði við in.fo: “Um tað stóð til mín, so blivu tey koyrd úr flokkinum. Tey hava einki at gera har.” Og: “Eg kann ikki ordiliga fyrigeva mær sjálvum, at eg havi verið við til at stovna ein flokk, sum fellir eitt slíkt uppskot.”

Í poddvarpi hjá Dimmalætting tosaði Sólvit millum annað um, hvussu hetta tíðarskeiðið var fyri hann:

- Tann tíðin var ikki stuttlig. Har komu nógv boð til mín, men tað hevði eg í ein ávísan mun roknað við. Har eru aðrir politikarar, ið hava roynt tað oftari enn eg og ógvusligari enn eg.

- Hinvegin eri eg soleiðis skrúvaður saman, at tey viðurskiftini eg ikki kann stýra, kann eg ikki gera nakað við. Hvussu fólk reagera upp á eina avgerð, eg havi tikið, kann eg undir ongum umstøðum gera nakað við.

Í kjalarvørrinum av orrustuni í samband við atkvøðugreiðsluna um fría fosturtøku valdi floksleiðslan at taka eina almenna støðu í málinum.

- Seinni fór flokkurin undir hesa tilgongdina at krevja, at tey, ið framyvir stilla upp fyri flokkin, skulu taka undir við fríari fosturtøku – og friður verið við tí.

Eftir at leiðslan tók avgerð um at binda síni tingfólk til framyvir at vera fyri fríari fosturtøku, var greitt, at dagarnir hjá Sólvit í Framsókn – og í politikki – fóru skjótt at vera taldir.

- Tað er fínt, og tað eri eg avkláraður við. Eg eri ikki partur av leiðsluni í flokkinum, og hatta er teirra avgerð – og tað er fínasta slag.

Floksleiðslan var tó ikki so avgjørd sum stovnarin av flokkinum, Poul Michelsen. Tey royndu bæði at binda síni tingfólk til at vera fyri fríari fosturtøku og samstundis kunna varðveita fólk, ið halda tað sama sum Sólvit, í flokkinum:

- Í eini roynd at halda tað opið fyri fólki at stilla upp, ið halda tað sama sum eg, royndu tey at tosa um ymiskar tekniskar møguleikar, sum mann kundi koyra í hetta.

-   Kundi tað verið ein avtala um, at tú fór í farloyvi tá uppskotið bleiv lagt fyri tingið?

- Mann diskuteraði alt møguligt sovorðið, men eg segði greitt, at tey skuldu halda seg vekk frá øllum slíkum. Antin máttu tey siga, at mann var fríttstillaður at atkvøða eftir egnari sannføring, ella ikki fríttstillaður.

Hoyr samrøðuna við Sólvit E. Nolsø, har hann greiðir frá síni politisku og journalistisku yrkisleið her: Samrøða við Sólvit E. Nolsø

Mest lisið hesa vikuna

Skal ungdómurin eggjast at droyma kommersielt?

Í gjár kl. 23:43

Stolnir málningar á rótikassanum

28. august kl. 13:32

Nú er neyðugt at verða serliga varin tá ið farið verður eftir nátungum

26. august kl. 12:15

Tvær bygdir í Suðuroy fáa grind í dag

15 tímar síðan

Suðuroyartunnilin vendir Suðuroynna á høvdið

21 tímar síðan

Eingin ábending um at menn rýma úr Føroyum undan skatti

27. august kl. 12:00