Tað er einki nýtt í, at Cristiano Ronaldo er ríkur. Men nú er hansara ríkidømi komið upp á eina søguliga upphædd.

Amerikanski vinnulívsmiðilin Bloomberg skrivar, at eftir at Ronaldo fyri nøkrum árum síðan flutti til Saudiarabia, skilur hann seg frá øðrum fótbóltsspælarum, hvat veldst um krónur og oyru.

Við eini ogn, ið hevur mett virði á 1,4 milliardir dollarar – sum eru umleið níggju milliardir krónur – er portugisiska stjørnan fyrsti milliardingurin í fótbóltssøguni, siga miðlarnir.

40 ára gamli áleyparin fekk umleið 550 milliónir dollarar í løn í europeiskum fótbólti millum 2003 og 2023. Men tann upphæddin stendur ikki mát við lønina, sum hann hevur fingið, síðan hann skifti til Al-Nassr í Saudiarabia.

Eftir øllum at døma fara 200 milliónir skattafríir dollarar beint inn á kontuna hjá Ronaldo um árið.