Føroysku spælararnir eru komnir í Unity Arena, har dysturin móti Sveis verður klokkan 19.30.

Sum myndin vísir, so sita fleiri teirra og hyggja at dystinum millum Slovenia og Montenegro. Har er spenningurin rættiliga stórur.

Vongurin Rói Berg Hansen er í kvøld á landsliðnum fyri 50. ferð. Av teimum, sum eru í hópinum hesa ferð, er tað bara Kjartan Johansen, sum hevur spælt fleiri landsdystir enn Rói. Kjartan hevur verið 53 ferðir á landsliðnum. Í kvøld eru tað hann og Helgi Hildarson Hoydal, sum ikki eru á listanum.

Ein av føroysku spælarunum, sum áður hevur roynt seg í norskum hondbólti, er Tróndur Mikkelsen. Hann spældi í fýra ár í norskum hondbólti, áðrenn hann síðsta summar flutti til HIF Karlskrona í Svøriki.

-Vit fegnast um, at tað nú verður álvari, eftir at vit síðani á nýggjárinum hava havt fokus á at fyrireika okkum. Tað sær út til, at mest sum allir áskoðararnir í høllini í kvøld fara at taka undir við okkum. Tað eru umleið seks túsund føroyingar, og tað er heilt fantastiskt og hevur stóran týdning. Og so halda norðmenninir eisini við okkum. Teir fegnast um, at vit eru her, og teir tosa einki um, at teir fyri tveimum árum síðani ikki megnaðu meiri enn javnleik ímóti okkum fyri tveimum árum síðani í Berlin, sigur Tróndur Mikkelsen.

Tað eru ikki nógvir áskoðarar til dystin millum Slovenia og Montenegro, men nú eru føroysku áskoðararnir so smátt farnir at fylla høllina.

Tróndur Mikkelsen