Tað er av álvara EM fepur og hondbóltsfepur í miðbýnum í Oslo. Tað eru tríggir tímar, inntil fyrsta bríksl verður í Unity Arena í Forneby. Høllin er vestanfyri Oslo, og tað tekur umleið 40 minuttir at koyra úr miðbýnum í Oslo og út til høllina.

Í dag hava teir mongu føroyingarnir av álvara sett dám á miðbýin í Oslo. Flogførini hjá Atlantic komu í fyrradagin og í gjár, og í dag eru fýra flogfør komin úr Føroyum og til Oslo. Norrøna liggur nú við bryggju í Oslo, og tað eru ikki so fáir føroyingar komnir úr Keypmannhavn og úr Jyllandi og til Oslo.

Fyrsta bríksl í dystinum millum Føroyar og Sveis verður klokkan 19.30, og nú eru føroyingarnir farnir á veg út í høllina eftir, at tað í allan dag hevur verið upphiting ymsastaðni í býnum. Tað sirmar, og tað eru trý hitastig.