Nú verður tað Útlendingastovan í Føroyum, sum skal taka støðu til, hvørjir útlendingr skulu sleppa til Føroyar at vera.
Tað varð veruleiki sunnudagin 1. septembur, tá ið tað mesta av útlendingamálunum vórðu yvirtikin frá dønum.
Annars hava tað verið danskir myndugleikar, sum hava átt avgerðina, men nú verða tey allarflestu málini viðgjørd í Føroyum.
Hetta merkir, at allar umsóknir um fyribils, og varandi, uppihaldsloyvi og arbeiðsloyvi, skulu sendast til Útlendingastovuna. Hetta eru eisini mál um familjusameining, arbeiði - eisini ítróttarfólk, umframt sjálvstøðugt vinnurekandi, lesandi, starvsnæmingar, granskarar, trúboðarar, og teirra familjur, og eisini pair-umsóknir.
Framvegis verða tó mál um visum, friðskjól, útvísing og ríkisborgararætt ikki avgreidd av føroyskum myndugleikum. Í slíkum førum kunnu danskir útlendingamyndugleikar enn veita neyðuga vegleiðing og ráðgeving. Landsstýrið sigur, at nú verður tað Udlændingenævnet í Danmark, sum verður kærumyndugleiki.
