Í eina tíð hevur verið arbeitt við at gera eitt apotek í Vágum fyri at gera tað høgligari hjá teimum at fáa fatur á heilivági.

Og í dag kom so dagurin tá ið apotekið læt upp.

Apotekið, sum er í Miðvági, er sætta apotekið í landinum og tað verður eitt stórt framstig fyri vágafólk og ferðafólk í Vágum.

Apotekið læt upp tá ið Súsanna Bertholdsen, landsstýriskvinna í heilsumálum, klipti snórin, og harvið varð apotekið alment opið.

Fimm fólk arbeiða á Vága apoteki, og tey eru øll har vesturi frá. Leiðandi farmakonomur á apotekinum er Kristina Niclasen. Men annars eru øll starvsfólkini við kassan á apotekinum, fakfólk, og kunnu veita góða ráðgeving um allar vørur.

Men sum nakað nýtt verður eisini ein automat við ymsum hondkeypsheilivági uttan fyri apotekið í Vágum.

Har kunnu fólk fáa høvuðpínutablettir, sjóverkstablettir, og annars tann mest vanliga hondkeypsheilivágin allan sólarkringin, hvønn dag í árinum.

Sjálvtøkan hevur 18 ára aldursmark og tað skal prógvast við appini, Skjáttuni hjá talgildu Føroyum.