Tað fyrsta juli búðu 55.042 fólk í Føroyum. Tað vísir ein nýggj uppgerð hjá Hagstovuni.
Hesar seinastu 12 mánaðirnar er fólkatalið sostatt vaksið 361 fólk, ella 0,7 prosent - og tað er eitt vet meiri enn frá 1. august í 2023 til 1. juli í fjør.
Tann 1. juli búðu tað sostatt, fyri fyrstu ferð, yvir 55.000 fólk í Føroyum.
Tá ið fólkavøksturin byrjaði í 2013 lá fólkatalið um 48.000. Tað er sostatt vaksið umleið 7.000 fólk, ella 14,6 prosent síðani tá.
Í 2017 rundaði fólkatalið 50.000 fyri fyrstu ferð.
Í 2018 fór tað upp um 51.000, í 2019 fór tað upp um 52.000.
Í 2021 fór fólkatalið upp um 53.000.
Í 2022 fór tað upp um 54.000.
Og nú í 2025 hevur fólkatalið, fyri fyrstu, ferð rundað 55.000.
Fólkavøksturin hetta seinasta árið stóðst av einum burðaravlopi upp á 163 fólk og einari nettoflyting upp á 198 fólk.
Tá burðaravlop og nettoflyting verða samanborið við fólkatalið, svarar tað til eitt burðaravlop upp á 3 børn fyri hvørji 1.000 fólk og eina nettoflyting á upp á 3,6 fólk fyri hvørji 1.000 fólk.
Burðaravlopið var størri enn í undanfarna tíðarskeiði, tí hóast nøkur fleiri doyðu, so vóru tað uppaftur fleiri børn, sum vóru fødd. Nettoflytingin minkaði nakað í mun til undanfarna tíðarskeið, tí meðan færri fluttu til Føroya, vóru uppaftur færri, sum fluttu úr Føroyum.
Í undanfarna tíðarskeiði frá 1. august í 2023 til juli í fjør, var burðaravlopið á 2,6 og nettoflytingin á 2,3 fyri hvørji 1.000 fólk.
Uppgerðin vísir, at burðartalið er vaksið nokk so fitt, so frá 1. august í fjør til 1. juli í ár, vórðu 616 børn fødd í Føroyum og tað eru 67 børn fleiri enn tað vórðu fødd frá 1. august í 2024 til 1. juli í fjør.
Frá 1. august í fjør til 1. juli í ár, doyðu 453 fólk og tað eru 46 fólk fleiri enn frá 1. august í 2023 til 1. juli í fjør. Tað gevur so eitt burðaravlop upp á 163 fólk.
Og frá 1. august í fjør til 1. juli í ár fluttu 1.564 fólk til Føroya, men tað fluttu 1.366 fólk av landinum, so nettotilflytingin er 198 fólk og tað gevur so eina nettotilflyting upp á 198 fólk.
Sostatt eru færri flutt til Føroyar hesar seinastu 12 mánaðirnar, samanborið við teir 12 mánaðirnar frammanundan, men samstundis eru eisini væl færri flutt av landinum.
