Í nátt hevur løgreglan aftur verið á ferð við skrúvusagaranum og hevur tikið nummarpláturnar av bilum.

Tað merkir, at í dag eru tað fýra bilførarar, sum ikki sleppa í bilin, tí pláturnar eru tiknar.

Løgreglan sigur, at tey hava ein langan lista við bilum, tey skulu taka pláturnar av, tí eigarin hevur ikki goldið vegskatt, goldið trygging, ella hann hevur ikki verið til umsýn við bilinum, ella hevur forsømt at skráseta eigaraviðurskifti.

Sostatt fer løgreglan aftur á ferð hesar næstu næturnar at taka plátur av bilum, sum tey hava á listanum.

Tað er bara ein máti at sleppa undan at missa pláturnar og tað er at hava kvittan fyri, at rokningarnar eru goldnar, og at øll viðurskifti annars eru í lagi.