Í morgun fóru suðuroyingar til Havnar at mótmæla viðferðina, ið suðuroyingar fáa frá landsins myndugleikum á samferðsluøkinum.

Hesa ferð er tað ikki Suðuroyartunnilin, sum spøkir, men heldur verandi samferðsla við Smyrli.

Her hugsa tey serliga um avloysaraskipini, sum hava verið, tá ið Smyril er í dokk – og nettupp á tí økinum varð botnurin rokkin í summar, tá ið Galaxy røkti suðuroyarsiglingina í góðar sjey vikur, ímeðan Smyril var í dokk.

Hesa seinastu tíðina hava suðuroyingar savnað undirskriftir saman fyri at mótmæla viðferðini, og tilsamans hava tey fingið 1.991 undirskriftir.

Sostatt hava eini 43 prosent av suðuroyingum skrivað undir, og í morgun fóru 130 av teimum norður til Havnar við Smyrli at handa Akseli V. Johannesen, løgmanni, og Ruth Vang, landsstýriskvinnu í fíggjarmálum, undirskriftirnar.

Info.fo skrivar í morgun, at boðskapurin frá Ruth Vang var, at fyri hana var tað merkisvert, at einki longu var gjørt við støðuna.

Men hon ásannar, at tað er ikki lætt at loysa trupulleikan.

Hon vil ikki lova gull og grønar skógir, men hon lovar at gera tað, ið hon kann, fyri at bøta um støðuna.

Nú verður ikki tørvur á avloysaraskipi aftur fyrr enn í 2028, og vit fara at finna eina loysn, lovaði Ruth Vang suðuroyingum.