Tað hendir seg av og á, at full fólk fara inn á Landssjúkrahúsið - kanska tí at tey ongastaðni hava at vera og so leita tey sær undir tak og inn í varman.

Men Landssjúkrahúsið er ikki eitt uppihaldsstað hjá fullum fólki og løgreglan sigur, at ofta er hetta ein trupulleiki á Landssjúkrahúsinum, serliga tá ið veðrið er ófantaligt, tí tey eru til ampa.

Og løgreglan sigur, at tríggjar ferðir í gjár, og í morgun, møtti løgreglan á Landssjúkrahúsi at vísa fullum fólki burtur.

Bæði tíðliga í gjáramorgunin, og tíðliga í morgun, varð løgreglan boðsend eftir sama manni, sum hevði leitað sær inn á Landssjúkrahúsið.

Og á midnátt í gjárkvøldið máttu tey eisini eftir einum manni, sum hevði verið til viðgerð á skaðastovuni, men sum ikki vildi útaftur tá ið hann var liðugur.