Í kvøld – eitt samdøgur undan fyrsta bríksli á Sheriff Stadion í Tiraspol – var KÍ liðið á dystarvøllinum og vandi, og tað sá ikki út til, at spælararnir sóu serliga forsagdir út.
KÍ liðformaðurin Jákup B. Andreasen eigur nógvar altjóða royndir.
Hann hevur spælt 30 altjóða dystir við KÍ, umframt at hann hevur spælt 18 landsdystir og 17 U-21 landsdystir. Hann er 25 ára gamal og á veg í besta fótbóltsaldur.
Í kvøld læt hann væl at umstøðunum á Sheriff Stadion og í Tiraspol sum heild. Í samrøðu við ki.fo sigur hann soleiðis:
-Grasvøllurin sær út til at vera hampuliga góður at spæla á. Ferðin higar gekk væl, og umstøðurnar á gistingarhúsinum og í síni heild kennast at vera góðar. Tað verður heitari at spæla í morgin, enn tað, sum vit eru vanir við, men hetta verður ikki so nógv øðrvísi, enn tað var, tá ið vit spældu í Ungarn, og tá gekk tað væl, sigur KÍ liðformaðurin í kvøld.
20 KÍ spælarar eru í ferðalagnum í Tiraspol. Millum hesar eru eisini spælararnir, sum hava verið skaðadarvaðir.
Eitt nú Claes Philip Kronberg, sum ikki hevur verið á liðnum seinastu ferðirnar, tí hann varð skaddur og miðskeiðis í seinna hálvleiki noyddist av vøllinum, tá ið KÍ 11. august spældi í Gøtu.
Aðrir, sum seinastu vikurnar hava verið skaðadarvaðir, og sum eru við í Tiraspol, eru Páll A. Klettskarð, Hallur Hansson, René Shaki Joensen, Heini Vatnsdal og Vegard Forren.
