Tá ið kavi er, hendir tað seg ofta, at børn og ungdómar hava stuttleika av at kasta kavabløk eftir bilum.

Men løgreglan sigur, at tað er nokk so vandamikið spæl, tí bilarnir kunnu fáa skaða, umframt at tað kann loypa hvøkk á bilføraran, so hann renur á, ella út av.

Eitt dømi um tað var í Leirvík í gjárkvøldið. Har kastaðu ungir dreingir kavabløk eftir einum bili, og har rakti eitt kavablak so meint, at forrúturin fór í spønir.

Løgreglan sigur, at nøkur fólk vóru í bilinum, eisini eitt pinkubarn, men fólkaskaði var eingin.

Fleiri ungir dreingir hildu til beins og løgreglan veit ikki, hvør tað var, sum kastaði kavabløkini. Men løgreglan heitir á foreldur um at tosa við børnini um álvarsemi í at kasta kavabløk eftir bilum.

Herfyri var tað sama ein afturvendandi trupulleiki í Klaksvík og eisini tá gjørdi løgreglan vart við hetta - og haðani eru ongar fráboðanir komnar um slíkt síðani.