HM í hondbólti er liðugt. Í dag vóru donsku heimsmeistararnir stórliga fagnaðir, tá ið teir vóru aftur í Keypmannahavn og høvdu stóra og tunga HM steypið við sær.
Talan er um heilt serligan sigur, tí hetta er fjórða ferðin á rað, at danska manslandsliðið er heimsmeistari. Danmark vann HM í 2019, 2021, 2023 og so nú í 2025. Næsta HM kappingin í manshondbólti verður um tvey ár í Týsklandi.
Hóast tað er vetrarkuldi í Keypmannahavn, so var tað stúgvandi fult av fólki og fagnaði heimsmeistarunum í dag. Soleiðis var tað seinnapartin í Kastrup, tá ið spælararnir komu úr lufthavnini eftir flogferðina úr Oslo, og soleiðis var tað fram við vegnum allan teinin inn á Ráðhúsplássið.
Millum nógvu túsund fólkini á Ráðhúsplássinum var Fríðrikur kongur, sum helt talu fyri danska liðnum, áðrenn spælararnir fóru út á svalan á ráðhúsinum og heilsaðu mannamúgvuni. Jóhan +a Plógv Hansen og liðfelagarnir lyftu hvør eftir annan steypið, og fjøldin fagnaði teimum.
Fimm spælarar royndu hetta, sum nú er siðvenja, fyri fjórðu ferð. Ein av teimum er føroyski Jóhan á Plógv Hansen. Konan, Astrd Juhl Kyhn og børnini Nora og Alfred vóru og tóku ímóti manninum og pápanum, sum er aftur eftir at hava verið burturi í HM ørindum í tríggjar vkkur.
Dimmalætting ynskir Jóhan á Plógv Hansen hjartaliga til lukku við HM heitinum. Fýra HM á rað er heilt framúr.
