Tá íð síðsta bríksl ljóðaði leygardagin í Runavík, var tað stórur fagnaður í reyðu leguni. Við 4-1 sigri tryggjaði B68 sær lívið í bestu deildini.
Jákup á Borg venjari var lættur um hjartað, tí nú segði hann farvæl við lið í bestu deildini og ikki við lið, sum var flutt niður í næstbestu deildina.
Í kvøld eru tíðindini av Svangaskarði, at venjarin kortini ikki gevst á Svangaskarði. Upprunaliga var sáttmálin millum B68 og Jákup á Borg eisini galdandi fyri 2025, men fyri nøkrum vikum síðani boðaði Jákup á Borg frá, at hann fór at gevast, tá ið hetta kappingarárið var av.
Soleiðis verður tað ikki. Jákup á Borg verður eisini í 2025 venjari hjá B68.
Tofta Ítróttarfelag skrivar soleiðis í kvøld:
Í eina tíð hevur ljóðað, at Jákup á Borg ikki fór at halda fram í B68 eftir kappingarlok.
Nýggja starvsnevndin í B68 og Jákup á Borg hava tosað saman um framtíðina, og gleðast um at kunngera, at góða samstarvið heldur fram, og at fyrireikingarnar til komandi kappingarár eru í gongd, skrivar Tofta Ítróttarfelag.
