Hurðin gongur títt í HB húsinum. Fyrr í dag varð kunngjørt, at felagið hevur keypt nýggjan málverja, og í kvøld eru tíðindini, at felagið hevur skrivað undir sáttmála við miðvallara.

Meðan málverjin er úr Lettlandi og ikki kendur í føroyskum fótbólti, so er nýggi miðvallarin ikki ókendur í HB.

Talan er um 21 ára gamla Heina Fossdalsá Sørensen, sum nógvu tey seinastu árini hevur roynt seg í donskum fótbólti. Nú er hann aftur í HB, sum er barndómsfelagið.

Eftir at hava spælt ungdómsfótbólt í FC Midtjylland, flutti hann á heysti í 2023 til Thisted FC, og nú er hann aftur í HB, sum hann í síni tíð spældi ungdómsfótbólt í.

Heini hevur spælt 12 dystir á U-21 landsliðnum og 10 dystir á U-19 landsliðnum.