Kært barn hevur mong nøvn, plaga vit at taka til. Ivaleyst er tað tí, at flest øll hava eina meining um staðarnøvn í tí umhvøri, tey eru partur av.

Tað halda tey í býráðnum í Klaksvík.

Og tey siga, at vøllurin við Djúpumýru, sum hann oftast verður nevndur, er eitt gott dømi um tað. Men nú hevur Klaksvíkar býráð samtykt at broyta tvey staðarnøvn í Klaksvík.

Annað staðarnavnið er nettupp økið, har vøllurin við Djúpumýru er. Nú eitur tað rætt og slætt til Djúpamýra og leikvøllurin á Másheygg eitur nú rætt og slætt, Másheygur.

Býráðið sigur, at hóast hetta hevur verið galdandi í nakrar mánaðir, verða hesi bæði plássini framvegis kalla alt møguligt, bæði í miðlum og av fólki í síni heild.

Men býráðið sigur, at her eru nøkur dømi um, hvussu Djúpamýra og Másheygur eiga at verða bend:

 Djúpamýra

Hetta er Djúpamýra! Leikvøllurin hjá KÍ

Dysturin verður leiktur á Djúpumýru

Kunning um ferðslu í samband við dyst á Djúpumýru

Másheygur

Hetta er Másheygur! Frælsur ítróttur og minni fótbóltskappingar verða leiktar her

Kappingin verður á Másheygi

Vit møtast á Másheygi