Tað var tann 14. mai í 1948 - fyri 77 árum síðani - at Ísrael varð endurreist. Sostatt er tjóðardagur Ísraels mikudagin 14. mai og hendan dagin fara Vinafelagið Føroyar-Ísrael og átrúnaðarligi felagsskapurin, ICEJ Føroyar, at hátíðarhalda.
Og tað gera tey við tiltaki á Tinghúsvøllinum í Havn, har tað verða bæði sangur og røður.
Tey siga í tíðindaskrivi, at á tiltakinum verður kendi tíðindamaðurin, Jotam Confino, við á stórskíggja, har hann fer at greiða frá um støðuna í Ísrael og í Miðeystri.
Jotam Confino er hálvur dani og hálvur ísraeli, hann er uppvaksin í Danmark men hevur búð tey seinastu árini í Ísrael.
Hann er javnan at síggja, sum viðmerkjari á BBC, CNN, CBS, Sky News, Haatetz, BT, og øðrum, stórum tíðindarásum.
– Hóast hetta er ein gleðidagur, liggja enn døkk skýggj yvir tjóðini, sum framvegis kennir sorg og trongd eftir ræðuligu yvirgangsatsóknina tann 7. oktober 2023, siga fyriskipararnir.
– Pinkubørn, børn, ung, vaksin og eldri vórðu myrd, og yvir 251 menniskju tikin sum gíslar inn í Gaza.
– Nú 19 mánaðir seinni, sita 59 gíslar enn í myrkum tunlum undir jørð. Bert 21 av teimum verða mett at vera á lívi.
– Um hesa tíðina í fjør høvdu vit vitjan av einum beiggja at gísla, sum framvegis vónaði at fáa hann heimaftur á lívi. Tann 3. mars í ár kom hann heim til Ísraels í kistu, dripin ímeðan hann sat sum fangi í Gaza.
– Vit hava ikki gloymt gíslarnar og teirra avvarandi, og biðja framvegis fyri teimum øllum, siga tey.
