Nýggj norsk kanning, sum varð almannakunngjørd 29. apríl, vísur, at børn hjá mammum, har mamman át fisk tvær ferðir um vikuna, meðan tær bóru barn undir belti, mentu seg betur sosialt og kensluliga, samanborið við børn hjá mammum, har mamman ikki át fisk, meðan hon bar barn undir belti.
- Tað er ein lítil munur, men vit síggja, at tað er ein munur á, ið týðir á, at børn hjá mammum, har mamman át meiri fisk, meðan tey bóru barn undir belti, mentu seg betur sosialt og kensluliga, sigur granskarin og sálarfrøðingurin Ingrid Kvested, ið arbeiðir fyri RKBU Vest - regionalt kunnskapssenter for barn og unge, sum er partur av NORCE (Norwegian Research Centre).
Tað skrivar norski havgranskingarstovnurin, eftir at ein grein um hetta evnið er almannakunngjørd í kenda føðitíðarritinum “The Journal of Nutrition”.
Í alt luttóku 137 kvinnur, ið vóru við barn, í kanningini, har tann eini bólkurin fekk tosk til døgurða tvær ferðir um vikuna í 16 vikur, meðan hin bólkurin fylgdi vanliga kostinum.
Niðurstøðan í kanningini er, at børn hjá mammum, har mamman át fisk tvær ferðir um vikuna, mentu seg betur sosialt og kensluliga, samanborið við børn hjá mammum, har mamman ikki át fisk tvær ferðir um vikuna.
Víðari skrivar stovnurin, at sosiala menningin hjá teimum sum fingu fisk sást aftur í mátanum, hvussu tey vóru før fyri at ugga seg sjálvi ella hvussu tey samskiftu við onnur, sum til dømis at smílast ella gera ljóð.
Saman við øðrum granskarum hevur Ingrid Kvested kannað menningina av børnunum í kanningini, tá tey vóru tríggjar, seks og ellivu mánaðir.
- Vit síggja, at tað er ein lítil munur á børnunum, men tað týdningarmikið at vísa á, at øll børnini eru innanfyri tað vanliga talstrekkið fyri smábørn í Norra hesum viðvíkjandi, sigur granskarin og sálarfrøðingurin.
