Í gjár varð ringt til løgregluna - tvær ferðir - at boða frá innbroti. Løgreglan sigur, at annað innbrotið var í Gamla bókhandli, men har varð einki stolið.

Hitt innbrotið var á Hotell Tórshavn og har stjólu tjóvarnir eitt sindur av pengum, og eitt sindur av rúsdrekka. Men talan var um smáttarí, sigur løgreglan.

Men løgreglan sigur, at tjóvarnir vóru tiknir upp á vakmyndatól, so tað gekst bæði skjótt og væl at eyðmerkja teir - og eisini at fáa fatur á teimum.

Løgreglan sigur, at talan er um ein mann og eina kvinnu. Kvinnan er leyslatin aftur, men maðurin er settur í varðhald. Tað varð hann tí hann verður førdur fyri rættin í dag við tað, at løgreglan vil hava hann varðhaldsfongslaðan í eina tíð, ímeðan tey kanna málið nærri.

Tey siga, at orsøkin til tað er, at maðurin hevur brotið inn fleiri ferðir áður.