Ígjøgnum summarið fer danska Forsvarið at økja um sína nærveru í Grønlandi og Arktis fyri at hava venjingar haruppi. Tey senda F-16 hernaðarflogfør, tyrlur og eina fregat avstað.

Tað skrivar Naalakkersuisut, grønlendska stjórnin, á heimasíðuni hósdagin.

Her fara millum annað special-styrkirnar at venja vetrarvenjingina.

Trygdarstøðan krevur, at Forsvarið venur førleikan at virka í og ​​kring Grønland. Tað hevur verið ein raðfesting hjá landsstýrinum at tryggja lokala luttøku, sigur ráðharrin fyri uttanríkis- og gransking Vivian Motzfeldt í tíðindaskrivi.

Eisini verða næmingar frá Arktisku grundútbúgvingini við til at styrkja landverju av kritiskum undirstøðukervi.

Verjumálaráðharrin, Troels Lund Poulsen úr Venstre leggur afturat í tíðindaskrivinum, at tað leingi hevur verið eitt prioritet hjá honum at styrkja trygdina í Arktis.

- Og eg virðismeti stórliga tað tætta samstarvið, eg havi við landsstýrið í Grønlandi, sigur hann.

Økta nærveran hjá herdeildunum skal gerast við eyga á lokalu umstøðunum og serligu trygdarpolitisku avbjóðingunum í Grønlandi, sigur hann.

Forsvarið fer eisini at hava ymisk tiltøk, sum skulu hjálpa til við at geva grønlendska fólkinum innlit í sítt arbeiði.

Hetta verður millum annað gjørt við, at grønlendingar sleppa umborð á donsk krígsskip fyri at vísa tey fram, og so tey kunnu fáa innlit í gerandisdagin hjá manningini.