Føroyskir sjúklingar, sum verða sendir til Keypmannahavnar til viðgerðar, skulu nú hava betri umstøður.

Verandi sjúklingahotell, Hotel Tórshavn, í Venøgade, er mangan ov lítið og tí er tað ikki óvanligt, at tað er neyðugt at senda sjúklingar og avvarðandi á onnur hotell at vera.

Hvørki tinglimir, ella Súsanna Bertholdsen, landsstýriskvinna í heilsumálum, halda, at hetta er nøktandi, tí er semja um, at tað er neyðugt at bøta um umstøðurnar.

– Hotell Tórshavn er ein sólskinssøga, staðfestir landsstýriskvinnan.

Hon sigur, at har fáa sjúklingar, og fylgjarar, eina fantastiska tænastu.

– Sjúklingar og avvarðandi fáa ikki bara mat og song, men tey fáa eisini eina umsorgan, sum ikki kann gerast upp í pengum, legði hon afturat.

Sostatt verður nú arbeitt fyri at útvega hotellinum betri umstøður.

Í hesum sambandi hevur bygningsstyrelsen í Danmark, víst landsstýrinum á eitt grundstykki beint við Ríkissjúkrahúsið.

Har kann eitt nýtt hotell verða bygt sum landsstýrið síðani kann leiga til sjúklingahotell.

Súsanna Bertholdsen sigur, at enn er ætlanin á fyrireikandi stigi, so enn ber ikki til at siga, nær eitt nýtt hotell verður klárt at taka í brúk.

Í hesum sambandi vísti Bárður á Steig Nielsen, løgtingsmaður fyri Sambandsflokkin á, at ætlanin er eisini at útvega grønlendingum nýtt sjúklingahotell.

Verandi sjúklingahotell hjá grønlendinum liggur beint við verandi Hotell Tórshavn.

Samstundis vísir Bárður á Steig Nielsen á sostatt fer tað grønlendska sjúklingahotellið at standa tómt.

Harafturat veit hann, at sjúklingar og fylgjarar eru sera væl nøgd við verandi sjúklingahotell, tí tað liggur mitt ímillum tey sjúkrahúsini, sjúklingar aloftast verða sendir til.

Tí spyr hann um tað ikki er ein møguleiki hjá Landsstýrinum at leiga grønlendska og knýta tað upp í Hotell Tórshavn.

Súsanna Bertholdsen sigur, at hetta er avgjørt ein spurningur, hon fer at kanna.