Í gjárkvøldið varð ringt til løgregluna at boða frá einum ógvusligum ferðsluóhappi í Vestmanna.

Talan var um ein bil, sum stóð á einum parkeringsplássi, men onkusvegna fór hann út av.

Har er rættiliga bratt, so bilurin fór eftir gronini, einar 5-6 metrar niður, har hann endaði í eini stoyptari húsagrund og legðist á takið.

Løgreglan sendi sjúkrabil og sløkkilið á staðið, og tað fór løgreglan eisini.

Førarin var einsamallur í bilinum og hann varð fluttur á Landssjúkrahúsið, men løgreglan veit ikki meiri um tað.

Løgreglan veit ikki, hví óhappið hendi, men tað bendir á, at talan var um ein menniskjansligt mistak av onkrum slagi - og tað er einki, sum bendir á, at rúsdrekka var uppi í.

Løgreglan sigur, at annars hevur tað verið stúgvandi fult av fólki í býnum í nátt, men tað hevur verið stak friðarigt.