– Tað følist virkuliga óveruligt. Tað hendi á degnum, tá ið Pálshøll fylti 10 ár. Sjálvt um eg veit, at tað "bara" er heldigt, so er tað enn ringt at finna eina forkláring uppá, at tað vóru just okur, sum vunnu.

– Eg vil øgiliga gjarna brúka høvið til at takka øllum sum hava sent okum heilsur. Tað er sera rørandi, sigur Pál Joensen, svimjarin, sum allir føroyingar kenna.

Hann vann heilar 2,2 milliónir í Gekkinum fríggjadagin.

Um nakar veit, hvussu tað kennist at vinna, so er tað Pál. Rættiliga nógvir sigrar eru komnir í hús í hansara svimjikarrieru.

Hart arbeiði lønar seg altíð, so ella so. Kanska var tað tí, at tað var júst Pál, sum fór við skattafría vinninginum hesa ferð. Kanska var tað ikki bara eydnan.