Tórshavnar kommuna arbeiðir í løtuni við at tillaga bústaðarverkætlanina Stóratjørn fyri býling 1 og 4. Endamálið er at fáa enn fjølbroyttari bústaðir og fleiri búeindir í økinum.

Við tillagingunum fer talið av búeindum at vaksa úr 218 upp í 420. Hetta verður gjørt við at byggja nakað tættari og skynsamari, samstundis sum dentur verður lagdur á at varðveita náttúruøkir í mest møguligan mun.

Kommunan vísir á, at lendið í høvuðsstaðnum er avmarkað, og at bústaðartørvurin er stórur. Tí er tað serstakliga týdningarmikið, at tær útbyggingar, sum kommunan fer undir, veruliga muna.

Ætlaða bústaðarblandingin í Stórutjørn er hendan:

• 162 íbúðir í raðhúsum

• 46 vanlig raðhús

• 60 blandaðar modul-eindar-íbúðir til m.a. eldri og støk

• 77–88 búeindir í samanbygdum krosshúsum

• 16 sethús

• og á leið 50 lestraríbúðir
  

Kommunan sigur seg við hesum vilja royna at endurtaka tað, sum eydnaðist væl við verkætlanina í Tórsbyrgi, men í líknandi stíl við Stórutjørn.