Enn ein feilur er funnin í fínteljingini av løgtingsvalinum, og nú er Jóhan Christiansen aftur í løgtinginum
Tjóðveldi fekk 6 tingfólk á løgtingsvalinum hesaferð. Valkvøldið var niðurstøðan, at Jóhan Christiansen varð valdur sum nummar 6 á listanum hjá Tjóðveldi. Hann fekk 307 atkvøður. Eirikur í Jákupsstovu fekk 304 atkvøður og var tí júst ov stuttur at koma í løgtingið.
Fínteljingin av løgtingsvalinum, sum varð gjørd fyrr í vikuni, broytti úrslitið. Eirikur í Jákupsstovu fekk 9 atkvøður aftrat í fínteljingini, meðan Jóhan Christiansen fekk 2 atkvøður aftrat. Eirikur yvirhálaði tí Jóhan Christiansen við trimum atkvøðum og varð valdur ístaðin.
Men nú er støðan aftur broytt. Ein feilur var í fínteljingini. Eirikur í Jákupsstovu skuldi bert hava 5 atkvøður aftrat, og Jóhan Christiansen skuldi hava 3 atkvøður aftrat. Harvið er endaliga úrslitið, at Jóhan Christiansen fekk 310 atkvøður, og Eirikur í Jákupsstovu fekk 309 atkvøður.
Niðurstøðan hjá løgtingsvalnevndini í morgun er tí, at Jóhan Christiansen nú er innanfyri aftur, og Eirikur Jákupsstovu er uttanfyri.
– Tíverri vóru nakrar atkvøður bólkaðar skeivt í fínteljingini. Vit harmast minstakið, men vit hava rættað tað, og nú er greitt, at Jóhan Christiansen er valdur í løgtingið og ikki Eirikur í Jákupsstovu, sigur Malan Johansen, forkvinna í løgtingsvalnevndini.
Tað hevur ikki eydnast okkum at fáa fatur á Eiriki í Jákupsstovu, men Jóhan Christiansen fegnast.
– Eg var sjálvandi fegin um at fáa boðini í morgun, og tað fyrsta, eg gjørdi, var at ringja til Eirik í Jákupsstovu at siga honum, at eg var keddur av, at hann endaði uttanfyri aftur. Hann trúði tí ikki. Hann helt, at eg sendi hann apríl, sigur Jóhan Christiansen.
