Nú er gjørt av at seta Lis Samuelsen í starv sum virkandi sóknarprestur í Norðstreymoyar vestara prestagjaldi.

Kirkjuráðini í kirkjunum í Norðstreymoyar vestara prestagjaldi hava havt fund og úrslitið var, at mæla bispi til at seta Lis Samuelsen í starvi sum virkandi sóknarprest í eitt ár, frá 1. septembur í ár.

Og tað hevur hann nú gjørt.

Í prestagjaldinum eru tríggjar kirkjusóknir, Vestmanna, Kvívík og Kollafjørður og Lis Samuelsen skal halda til í Vestmanna.

Lis Samuelsen hevur drúgvar royndir sum prestur. Hon var prestur í Sorø Klosterkirke í Danmark í 12 ár.
Eisini hevur hon verið herprestur hjá tí donsku verjuni, har hon m.a. hevur verið í Estlandi í tríggjar mánaðir og arbeitt sum herprestur. 

Seinastu tíðina hevur hon verið vikar ymsastaðni í føroysku fólkakirkjuni. Tað seinasta var í Suðurstreymoyar vestara prestagjaldi nú á summarinum, sum farið er.